Ҳаммаси Ҳусановга қолди: Рубен Диаш ҳам узоқ вақтга сафдан чиқди

"Манчестер Сити" марказий ҳимоячиси Рубен Диаш "Челси"га қарши ўйинда тизза ости пайини шикастлаб олгани маълум бўлди.

Текширувлардан сўнг 28 ёшли португалиялик футболчи камида 6 ҳафтани ўтказиб юбориши аниқланди.

Аввалроқ, жамоанинг бошқа бир марказий ҳимоячиси Йошко Гвардиол катта болдир суягини синдириб олгани сабаб 3-6 ойга сафдан чиққан эди.

Энди "шаҳарликлар" марказий ҳимояда асосий футболчи сифатида Абдуқодир Ҳусановга таянади. Жамоа 7 январь куни АПЛда "Брайтон"ни қабул қилади.