Ҳафтанинг энг оғир куни маълум бўлди. Бу душанба эмас...

Душанбани меҳнаткашлар учун энг оғир кун деб ҳисоблаш одат тусига айланиб улгурган. Ваҳоланки, айни шу кундан иш ҳафтаси бошланади.

Бироқ психолог Ирина Блинникова жума куни ҳам ҳафтанинг энг оғир куни бўлиши мумкин деб ҳисобламоқда.

Бу ҳақда мутахассис Sputnik радиосига берган интервьюсида айтиб ўтди.

Унинг фикрига кўра, айнан ҳафта охирига келиб ходимларда ҳам жисмоний, ҳам руҳий чарчоқ тўпланади.

Бундан ташқари, кейинроққа сурилган ишлар ҳам ўзлари ҳақида дарак бера бошлашади. Муҳим ишларни кейинга қолдириш одати ўз навбатида иш ҳафтасидан чарчаган одамда юкни кўпайтириб, айнан жума куни тугалланмаган ишларни якунлашга мажбур қилади.

Ушбу "стратегия" эса соғлиқнинг ёмонлашишига олиб келиши мумкин.

Бироқ ҳафтанинг сўнгги иш куни ҳам бир қатор афзалликларга эга. Айнан жума куни одам ҳафта охири ва яқинлашиб келаётган дам олишдан илҳом олади, бу эса ишчанликни оширади.

Шунингдек, мутахассиснинг таъкидлашича, одатда, душанба ҳафтанинг энг оғир куни сифатида қайд этилади, чунки беш кунлик давр бошида одам дам олишдан иш жойига кескин ўтишга мажбур бўлади. Натижада кўплаб хатоларга йўл қўйилади.