Грузия НАТОга киришга тўлиқ тайёрлигини маълум қилди

Грузия бош вазири Георгий Гахария унинг мамлакати Ғарб давлатлари ва НАТО билан ҳамкорликни янада ривожлантиришини маълум қилди. 

“Биз стратегик йўналишлар бўйича ҳамкорлигимизни ривожлантиришни давом эттирамиз – бу НАТО, АҚШ ва Европа Иттифоқи. Бугун Грузия НАТОга киришга тўлиқ тайёр. Буни ҳамкорларимиз кўриб туришибди ва қадрлашади. Биз бу жараённи албатта охиригача олиб борамиз”, – деди Гахария Россия ва Грузия ўртасида бўлиб ўтган беш кунлик уришнинг 12 йиллигига бағишланган нутқида. 

Унинг таъкидлашича, Евроатлантика интеграцияси ва мамлакатнинг тинч тараққиёти Грузиянинг ҳудудий яхлитлигини тиклашнинг мажбурий шартидир. 

2008 йилда Россия президенти бўлган ва ҳарбий операция бошлаш ҳақидаги қарорни қабул қилган Дмитрий Медведев эса ижтимоий тармоқдаги саҳифасида Грузия ҳукуматнинг Абзахия ва Жанубий Осетия аҳолисига нисбатан ҳаракатларини жиноят деб атади. Унинг таъкидлашича, Россия Федерацияси Абхазия ва Жанубий Осетияни Грузиянинг агрессиясидан ҳимоя қилган, уларнинг мустақиллигини тан олган.    

Россия ва Грузия ўртасида 2008 йилнинг 8-12 август кунлари юз берган ҳарбий ҳаракатларда жами 850 чоғли киши ҳалок бўлган. Ўттиз мингга яқин грузин ҳали ҳам Жанубий Осетияга қайта олмаяпти.  

Уруш Европа Иттифоқининг ва шахсан Николя Саркозининг аралашуви билан тўхтатиб қолинган. У Дмитрий Медведев билан бирга тинчлик битими лойиҳасини ишлаб чиққан. Россия ҳалигача мазкур битимнинг бир пунктини бажаргани йўқ – Абзахия ва Жанубий Осетиядан аскарларини олиб чиқмаяпти. 

Бундан ташқари, Москва ҳар икки ҳудудни “суверен давлат” сифатида тан олган. Абхазия ва Жанубий Осетиянинг мустақиллигини Россиядан ташқари фақатгина Никарагуа, Венесуэла, Науру ва Сурия тан олган. Халқаро ҳамжамият эса Абхазия ва Жанубий Осетияни ҳали ҳам Грузиянинг бир қисми деб ҳисоблайди.