Германияда Илья Яшин тузаётган партиянинг қурултойи очилди

Энг қизиғи, Партия логотипида мушук тасвирланган, деб ёзмоқда "Meduza".

Берлинда 12 ва 13 июн кунлари сиёсатчи Илья Яшин эълон қилганидек, мухолифатдаги россияликлар манфаатларини ҳимоя қилувчи сиёсий партиянинг таъсис қурултойи бўлиб ўтмоқда.

Оммавий ахборот воситалари ва делегатларнинг ўзлари томонидан қурултойдан эълон қилинаётган суратларда "Россия тинчликсевар кучлари" (Мирные силы России) номи туширилган баннерлар ва партиянинг логотипи — мушукнинг дизайнлаштирилган тасвири кўзга ташланди. Партиянинг расмий номи ҳозирча йўқ.

Яшиннинг ёзишича, ташкилий қўмита уни "Россия тинчликсевар кучлари" деб аташни таклиф қилган, бироқ бу, унинг сўзларига кўра, кутилганидек ижтимоий тармоқларда баҳс-мунозараларга сабаб бўлган. Шунингдек, партияни "Тинчликсевар Россия" (Мирная Россия) деб аташ режалаштирилаётгани ҳақида ҳам хабарлар пайдо бўлди.

Яшиннинг айтишича, бу номда муҳим тарихий ишора бор. "2011 йил декабрида Москвадаги юз минг кишилик норозилик митингида чиқиш қилган Алексей Навалний: "Мен бу майдонда Кремлни ҳужум билан эгаллаш учун етарли одамларни кўряпман. Аммо биз — тинчликсевар кучмиз", деган эди", — дея эслатди у.