Ғазони тиклаш учун Тинчлик кенгаши тузилади – Трамп

АҚШ президенти Дональд Трамп Ғазо секторини қайта тиклаш билан шуғулланадиган Тинчлик кенгаши ташкил этилишини маълум қилди. Бу ҳақда у ўзининг Truth Social ижтимоий тармоғида ёзди. Кенгаш таркиби ҳозирча ошкор этилмаган, у яқин вақт ичида эълон қилиниши кутилмоқда.

«Ишонч билан айта оламанки, бу ҳар қандай даврда ва ҳар қандай жойда ташкил этилган энг буюк ва энг нуфузли Кенгаш бўлади», – деб ёзди Трамп.

Бу баёнот АҚШ томонидан Ғазодаги урушни тугатиш бўйича президент Трамп режасининг иккинчи босқичи ишга туширилгани ҳақидаги хабарлар ортидан янгради. 14 январь куни АҚШ президентининг махсус вакили Стив Уиткофф иккинчи босқич доирасида ўт очишни тўхтатишдан кейин демилитаризация, технократик бошқарув ва секторни қайта қуришга ўтиш режалаштирилаётганини билдирган эди.

Трамп режасининг биринчи босқичи ўтган йил октябрь ойида амалга оширилган бўлиб, унда ҲАМАС ва Исроил ўртасида ўт очишни тўхтатиш тўғрисида келишувга эришилган, шунингдек, гаровдагилар ва маҳбуслар алмашилган эди.

Иккинчи босқичда эса Ғазо секторида ўтиш даври ҳукумати тузиш, ҳудудни қайта қуриш ҳамда тўлиқ демилитаризация қилиш назарда тутилган. Бу жараён ҲАМАС ва бошқа фаластин қуролли гуруҳларини қуролсизлантиришни ҳам ўз ичига олади.

Стив Уиткоффнинг таъкидлашича, АҚШ ҲАМАСдан ўз мажбуриятларини тўлиқ бажаришни, жумладан, ҳалок бўлган охирги гаровдагининг жасадини зудлик билан қайтаришни кутмоқда.

«Бу талаб бажарилмаса, жиддий оқибатлар келиб чиқади», – деган эди у.

Шу билан бирга, The Wall Street Journal газетаси манбаларга таяниб ёзишича, ҲАМАС уруш давомида йўқотилган ҳарбий салоҳиятини тиклаш устида иш олиб бормоқда. Хусусан, зарар етган туннел инфратузилмаси қайта қурилаётгани айтилмоқда. Нашр маълумотларига кўра, бу ҳолат фонида Исроил ҳарбий қўмондонлиги янги қуруқлик амалиёти режаларини ишлаб чиқмоқда, чунки гуруҳ қуролсизланишдан бош тортмоқда.