Франция Украинага 500 кмгача масофага уча оладиган бир нечта дронларини совға қилди

Франциянинг EOS Technologie компанияси Украинага 500 км гача масофага уча оладиган бир нечта Rodeur 330 ҳужум дронларини совға қилди.

Бу ҳақда France 24 хабар берди.

EOS Technologie президенти Жан-Марк Зулиани Ғарб ишлаб чиқарувчилари учун дронларни Украинага топшириш дронларни дала шароитида синаб кўриш учун ноёб имконият эканлигини таъкидлади.

Таъкидланишича, разведка миссияларини ҳам, камиказе ҳужумларини ҳам бажаришга қодир бўлган ушбу модель Европада кўпроқ "қалқон" сифатида, Украинада эса "қилич" сифатида ишлатилиши мумкин.

Rodeur 330 - бу Франциянинг EOS Technologie компаниясининг ҳужум дронидир. Дрон катапульта ёрдамида учирилади ва беш соатгача ҳавода қолиши мумкин.

Дроннинг юк кўтариш қобилияти 4 кг ва парвоз масофаси 500 км гача, қанотлари эса 3,3 м. Rodeur соатига 120 км тезликда ва 5000 м гача максимал баландликда ҳаракатланади.