Франция ҳукуматининг стратегияси ишлай бошлади

Бюджетни парламентсиз тасдиқлаш ва ишончсизлик вотумидан қўрқмаслик: Франция ҳукуматининг стратегияси ишлай бошлади.

BBC'нинг хабар беришича, жума куни Франция ҳукумати бош вазир Себастен Лекорнюнинг 2026 йилги бюджетнинг даромад қисмини парламент розилигисиз жорий этиш қарори ортидан киритилган икки ишончсизлик вотумига қарамай, ҳокимиятни сақлаб қолди.

Қайд этилишича, ўта сўл “Бўйсунмас Франция” партияси томонидан “яшиллар” ва коммунистлар билан биргаликда киритилган ишончсизлик вотумини 269 нафар депутат қўллаб-қувватлади. Ҳукуматни истеъфога чиқариш учун эса камида 288 овоз талаб этиларди. Ўта ўнглар ташаббуси билан киритилган иккинчи ишончсизлик вотуми эса бундан ҳам камроқ депутат томонидан қўллаб-қувватланди.

Шунингдек, бош вазир ўзининг рамзий ғалабасидан сўнг Конституциянинг 49.3 моддасидан 2026 йилги бюджетни мажбурий тасдиқлаш ва харажатлар қисмини белгилаш учун фойдаланишини эълон қилди. Франция Конституциясининг 49.3 моддаси ҳукуматга парламент овозисиз қонунлар қабул қилишга рухсат беради.

Бунга жавобан сўллар янги ишончсизлик вотуми эълон қилиш ниятида эканини маълум қилди.