Франция бортида 1700 дан ортиқ одам бўлган кемани карантинга олди

Расмийлар унда норовирус авж олганини тахмин қилмоқда.

12 май куни кечқурун Франциянинг Бордо шаҳрига етиб келган Буюк Британиянинг Ambassador Cruise Line компаниясига тегишли Ambition круиз лайнерида 90 ёшли йўловчи вафот этди. Франция санитария идоралари кемада норовирус оқибатида юзага келувчи гастроентерит (ошқозон-ичак яллиғланиши) тарқалган деб гумон қилмоқда.

Карантинга олинган йўловчиларнинг аксарияти Буюк Британия ва Ирландия фуқароларидир.

Жиронда префектураси ва минтақавий соғлиқни сақлаш агентлиги хабарига кўра, 50 кишида “ўткир ичак инфекциясига мос келувчи” аломатлар кузатилган. Озиқ-овқатдан заҳарланиш версияси ҳам ҳозирча бутунлай инкор этилмаган.

Франция соғлиқни сақлаш органлари вакилларининг таъкидлашича, ушбу ҳолатни MV Hondius кемаси бортидаги ҳантавирус билан касалланиш ҳолатлари билан боғлашга ҳеч қандай асос йўқ.

6 май куни Ambition лайнери Буюк Британия шимолидаги Шетленд оролларидан йўлга чиққан эди. Кема Бордога етиб келгунга қадар Буюк Британиянинг Белфаст, Ливерпул ва Франциянинг Брест шаҳарларига кириб ўтган. Режага кўра, у кейинчалик Испанияга йўл олиши керак эди.