Франция бугун 7 июнда АҚШга иккинчи Озодлик ҳайкалини юборади. АҚШда машҳур ҳайкалнинг «қиёфадоши» 10 йил қолади.
BFMTV нашрининг хабар беришича, АҚШга юбориладиган ҳайкал XIX аср охирида Гюстав Эйфел томонидан яратилган «оригинал» Озодлик ҳайкалининг анча кичик нусхаси ҳисобланади. Унинг баландлиги бор-йўғи 2,83 метрни ташкил қилади. Шу кунгача у Париж кўчаларидан бирида ўрнатилган бўлган.
Ҳайкал АҚШга Мустақиллик куни нишонланадиган 4 июлда етиб келади. У Нью-Йорк яқинидаги Эллис оролида жойлашган миграция миллий музейига ўрнатилади ва у ерда 10 йил қолади.
Озодлик ҳайкали Америкага 1886 йилда Франция ҳукумати томонидан АҚШ мустақиллик декларациясининг 100 йиллиги муносабати билан совға сифатида юборилган. 135 йил ўтиб Франция икки давлат дўстлигини тасдиқлаш мақсадида АҚШга яна битта Озодлик ҳайкалини жўнатмоқда.
Озодлик ҳайкали Нью-Йорк қўлтиғидаги Озодлик оролида жойлашган. Ҳайкалнинг баландлиги 46 метрни, постаменти билан эса 93 метрни ташкил қилади. 1984 йилдан ЮНЕСКОнинг Бутунжаҳон мероси рўйхатига киритилган.
