FIFA президенти Трамп маъмуриятидан ёрдам сўрамоқчи

FIFA президенти Жанни Инфантино ўз лавозимини сақлаб қолишда Доналд Трамп маъмуриятидан ёрдам сўрамоқчи — The New York Post.

Нашр манбаларига кўра, Инфантино бугун, 3 август куни АҚШ Давлат котиби Марко Рубио билан учрашиши режалаштирилган.

"У Давлат котиби билан боғланиб, футбол Америка юмшоқ кучининг бир қисми бўлиши мумкинлигини муҳокама қилмоқчи эди. Аммо барчамиз биламизки, гап аслида унинг ишдан четлатилишининг олдини олиш ҳақида кетмоқда. Ҳозир бошқа нарса ҳақида гапиришнинг иложи йўқ", — дейди The New York Post манбаларидан бири.

Инфантино FIFA'нинг тижорат ҳуқуқларининг бир қисмини хусусий инвесторларга сотиш ташаббуси билан чиққанидан сўнг кескин танқидларга учраган эди. Кейинчалик у мазкур режадан воз кечган. Манбаларнинг айтишича, можаро авж олган пайтда Инфантино Трамп билан ҳам бир неча бор телефон орқали боғланишга уринган.

FIFA ушбу ташаббус орқали 4,2 миллиард доллар жалб қилиш мумкинлигини маълум қилган. Бироқ, ушбу ташаббус футбол расмийлари, миллий федерациялар ва бошқа ташкилотлар томонидан кескин танқид қилинди.

Аввалроқ UEFA FIFA президенти Жанни Инфантинога нисбатан ишончсизлик вотуми орқали уни лавозимидан четлатмоқчилиги ҳақида хабар берилганди.