Фалькао қишда «Реал»га ўтиши мумкин

«Монако» ҳужумчиси Радамель Фалькао қишда «Реал» аъзосига айланиши мумкин, деб ёзади "tribuna.uz".

Нашрнинг аниқлашича, колумбиялик футболчининг агентни Жорже Мендеш ўз мижози учун янги клуб ахтармоқда. У Мадрид клубига тегишли таклиф билан чиққан.

Ўйинчининг монегасклар билан шартномаси 2020 йил ёзигача муддатга тузилган.

Қайд этилишича, Фалькао айни пайтда клубда юзага келган вазиятдан фойдаланиб қолмоқчи. Яъни, «Монако»нинг Франция чемпионатида энг қуйи поғонада бораётгани ва клуб хўжайини Дмитрий Риболовлевнинг йирик коррупцион можаро марказида бўлиб тургани унинг клубдан ўзини қўйиб юборишларини талаб қилиши учун сабаб сифатида хизмат қилиши мумкин.

Ушбу трансфер тўла харид асосида эмас, балки ярим йиллик ижара ҳуқуқи тарзида амалга ошиши эҳтимоли ҳам кўриб чиқилмоқда.

32 ёшли Фалькао мавсумда клубнинг ички чемпионат ва Чемпионлар лигасидаги 14 ўйинида қатнашиб, 4 та гол ва 2 та голли пас муаллифи бўлган. 

Маълумот учун, Мадрид Радамель учун бегона шаҳар эмас. У 2011-2013 йилларда икки мавсум «Атлетико» аъзоси бўлган ва умумий 91 та ўйинда 70 та гол урган.