Европарламентда Трампга бағишланган «Апельсин ўлати» ҳайкали намойиш этилди

Европарламентда АҚШ президенти Дональд Трампга бағишланган сатирик ҳайкал намойиш этилди. «Orange Plague» — «Апельсин ўлати» деб номланган асар Даниялик рассом Йенс Гальшиот томонидан яратилган.

Ҳайкалда Трамп баланд бўйли, семиз ва тўлиқ олтин рангда, яланғоч ҳолда тасвирланган. У озғин эркакнинг елкасида ўтирган. Қўлида жуда узун гольф таёғи, ёнида эса Ер сайёраси шаклидаги гольф тўпи бор. Бошқа қўлидаги тарози адолат рамзи бўлган Юстиция тимсолига ишора қилади.

Рассом асарни яна «King of Injustice» — «Адолатсизлик қироли» деб ҳам атайди.

Ҳайкал илк бор 2025 йил декабрь ойида Бразилиядаги БМТ иқлим конференцияси доирасида намойиш этилган. 2026 йил февраль ойида эса Мюнхен хавфсизлик конференциясида кўрсатилган.

Энди асар бир неча кунга Страсбургдаги Европарламент биносига олиб келинди. Уни Даниянинг сўл қанот депутати Пер Клаусен таклиф қилган.

Рассом асари орқали Трампнинг сиёсий фаолияти ва дунёдаги таъсирига нисбатан сатирик муносабатини ифодалаган.

Ҳайкал ёнидаги матнда эса қуйидаги фикр келтирилган: «Мен бир инсоннинг елкасида ўтираман. У менинг оғирлигим остида эгилиб боради. Мен унга ёрдам бериш учун ҳамма нарсани қиламан. Фақат унинг елкасидан тушишдан ташқари».