Европа жанубидаги ўрмон ёнғинлари назоратга олинмаяпти: жаҳон ОАВ вазиятни баҳолади

Франция ва Испанияда юз бераётган йирик ўрмон ёнғинлари ҳамон назорат остига олинмаган. Табиий офат оқибатида 250 мингдан ортиқ одам эвакуация қилинди. Халқаро оммавий ахборот воситалари ёнғинларнинг оқибатлари ва уларга қарши курашдаги муаммоларга кенг эътибор қаратмоқда.

The Times нашрининг ёзишича, Бордо атрофидаги вазият «апокалиптик» тус олган. Осмон тўқ сариқ тусга кирган, ёнғинлар 35 минг гектардан ортиқ ҳудудни қамраб олган. Нашр ўт ўчирувчилардан бирининг: «Бизда фақат битта ўт ўчириш машинаси бор... Биз шунчаки уйларнинг ёниб кетишига йўл қўйдик», деган сўзларини келтиради.

Испаниянинг La Vanguardia газетаси ёнғинларни миллий фавқулодда вазият деб баҳолаб, юзага келган ҳолат учун нафақат ўт қўйувчилар, балки ўрмонларни парвариш қилмаган мулкдорлар ва молиялаштиришни қисқартирган давлат идоралари ҳам масъул эканини таъкидлади. Нашрга кўра, бундай офатларга қарши курашиш учун узоқ муддатли режалаштириш ва муассасалар ўртасидаги мувофиқлаштириш зарур.

Франциянинг Le Diplomat нашри эса мамлакатда 42 минг гектардан зиёд ҳудуд ёнганини, Бордо хавф остида қолганини ёзди. Нашр фуқаролик мудофааси учун ажратилаётган маблағлар етарли эмаслигини танқид қилиб, сўнгги йилларда ёнғинларга қарши тайёргарлик даражаси пасайганини қайд этди.

Хитойнинг CGTN телеканали Франция ва Испаниядаги иссиқ ҳаво ҳамда қурғоқчилик улкан ёнғинларни келтириб чиқараётганини таъкидлади. Телеканал мухбирлари катта ўрмон майдонлари кулга айланганини, ҳаводаги қалин тутун кўриш масофаси ва ҳаво сифатини кескин ёмонлаштирганини маълум қилди. Шунингдек, Бордонинг машҳур узумзорларида тутун бу йилги ҳосилга салбий таъсир кўрсатиши мумкинлиги айтилди.

Мутахассислар фикрича, Жанубий Европа ҳар йили кучайиб бораётган ёнғинлар мавсумига дуч келмоқда. 1980 йилдан буён Европа глобал ўртача кўрсаткичга нисбатан икки баробар тез исиб бораётган қитъа ҳисобланади, бу эса йирик ўрмон ёнғинлари хавфини янада оширмоқда.