Европа Иттифоқи Россияга қарши санкцияларнинг 21-пакетини жорий этди

Янги чекловлар Россиянинг энергетика, молия ва ташқи савдо соҳаларига босимни кучайтиришга қаратилган.

"Россияга босимни кучайтириш йўлидаги яна бир қатъий қадамни қўйдик. Санкцияларнинг 21-пакети энг катта таъсир кўрсатадиган соҳаларга — энергетика, молиявий хизматлар, криптовалюта сектори ва савдога қаратилган. Украинани қўллаб-қувватлаш, шунингдек, адолатли ва барқарор тинчликка бўлган интилишимиз қатъийлигича қолади", — деди Европа кенгаши раиси Антониу Кошта.

21-санкциялар пакетига яна 32 та Россия банки, криптовалюта платформалари, нефт савдоси билан шуғулланувчи компаниялар ҳамда “Россиянинг ҳарбий ҳаракатларини қўллаб-қувватламоқда” деб ҳисобланган юзлаб юридик ва жисмоний шахслар киритилди. Шунингдек, Россия нефтини нарх чекловларини четлаб ўтиш учун ишлатилаётган “соя флоти”даги яна ўнлаб кемаларга қарши ҳам санкциялар кенгайтирилди.

Яна бир муҳим қарор, Россия нефти учун белгиланган нархнинг юқори чегарасига қўйилган 44 долларлик чекловни яна бир йил сақлаб қолиш бўлди.