Европа чемпионати финали доирасида Испания Англияни мағлуб этиб, чемпионга айланди.
Финал Берлиндаги «Олимпиаштадион»да ўтказилди. Ҳал қилувчи баҳснинг биринчи бўлими испанлар устунлигида ўтган бўлса-да, ҳисоб очилмади. Иккинчи бўлим бошида эса Нико Уилямснинг голидан кейин испанлар олдинга чиқиб олди.
70-дақиқада захирадан майдонга тушган Коул Палмер уч дақиқа ўтиб, кучли зарбаси билан фарқни тенглаштирди – 1:1.
Ўйин якунига яқин испанлар сафида захирадан майдонга тушган Ойарсабал 86-дақиқада гол уриб, Испанияга қитъа чемпионлигини келтирди – 2:1.
Шу тариқа, Англия кетма-кет иккинчи Евро финалида мағлубиятга учраган бўлса, Испания ўз тарихида 4-марта қитъа чемпиони бўлди ва бу борада рекордчига айланди.