«Eurovision 2024» ғолиби Исроил сабаб совринини қайтариб бермоқчи

«Eurovision 2024» ғолиби Исроилнинг 2026 йилги танловда иштирок этиши мумкинлиги ҳақидаги хабарлардан сўнг совринини қайтариб берди.

Исроилнинг 2026 йилдаги «Eurovision» танловида иштирок этиши ҳақидаги хабарлардан сўнг танловнинг 2024 йилдаги ғолиби швейцариялик қўшиқчи Немо қўлга киритган совринини қайтариб бермоқда.

«Гап шундаки, танлов маъмурияти жиддий айбловларга дуч келаётган давлатнинг имижини тиклаш учун бир неча бор уриниб кўрмоқда», – деб ёзди Немо Инстаграм саҳифасида.

У БМТ Инсон ҳуқуқлари кенгашининг тергов комиссияси Исроил ҳукумати ва хавфсизлик кучлари Ғазо секторида геноцид содир этган деган хулосага келганини таъкидлади.

«Eurovision» ташкилотчиларининг сўзларига кўра, танлов бирлик, инклюзивлик ва инсоний қадр-қиммат анъаналарини қўллаб-қувватлайди. Аммо Немо Исроилнинг иштироки бу қадриятлар ва Европа телерадиоэшиттириш иттифоқи қарорлари ўртасидаги зиддиятни кўрсатади, деб ҳисоблайди.

Ўтган ҳафта Женевада бўлиб ўтган йиғилишда Европа телерадиоэшиттириш иттифоқи аъзолари Исроилнинг иштирокини маъқуллашди. Бунга жавобан Испания, Нидерландия, Ирландия, Словения ва Исландия телерадиоэшиттириш компаниялари Вена шаҳрида бўлиб ўтадиган 2026 йилги қўшиқ танловини бойкот қилишни режалаштирмоқда.

Немо кубокни танловнинг Женевадаги бош офисига қайтариб беришини эълон қилган.