Эронда уриб туширилган америкалик учувчи қутқарилди

Эронда уриб туширилган Американинг F-15E қирувчи самолётининг қутқариб олинган иккинчи учувчиси тиббий ёрдам олиш учун Кувайтга етиб келди. Бу ҳақда АҚШнинг юқори лавозимли ҳарбий мулозимига таяниб, New York Times нашри хабар бермоқда.

«Қутқарув самолётлари жароҳатланган учувчини тиббий ёрдам кўрсатиш учун Кувайтга етказди», — дейилади нашр материалида.

Газета маълумотларига кўра, қидирув-қутқарув операцияси қарийб икки кун давом этган. Унда юзлаб махсус топшириқли аскарлар, ўнлаб самолётлар, шунингдек, коинот ва рақамли разведка воситалари иштирок этган.

Аниқлик киритилишича, учувчи катапульта қилгандан сўнг тоғ тирқишига яширинган. Дастлаб унинг қаерда эканлигини на эронликлар, на америкаликлар билишган, бироқ учувчида маёқча ва алоқа воситалари бўлган.

АҚШнинг юқори лавозимли мулозими Марказий разведка бошқармаси (МРБ) эронликларни учувчи аллақачон қутқарилган ва қуруқлик орқали олиб чиқиб кетилмоқда, деб ишонтириш учун дезинформация кампаниясини ўтказганини сўзлаб берди. Учувчининг манзилини айнан МРБ аниқлаган. Иккинчи учувчи қуролланиш тизими оператори бўлган.