Эрон расмийлари илк бор Мўжтаба Хоманеий иштирокидаги видеони эълон қилди

Эроннинг давлатга қарашли «Меҳр» ахборот агентлиги Олий раҳбар Оятуллоҳ Мўжтаба Хоманеий иштирокидаги видеолавҳани биринчи марта эълон қилди.

Қисқа видеода Мўжтаба Хоманеий бир неча нафар эркак қуршовида гилам устида ўтиргани акс этган. Видеода қўшиқлар янграйди, бироқ иштирокчилар нимани муҳокама қилаётгани номаълум. Шунингдек, видеолавҳа қачон тасвирга олингани ҳам маълум қилинмаган.

Бу Мўжтаба Хоманеий 2026 йил март ойида Эрон Олий раҳбари этиб тайинланганидан бери унинг иштирокида эълон қилинган биринчи видеодир.

Мўжтаба Хоманеий АҚШ ва Исроилнинг ҳарбий амалиёти бошланганидан кўп ўтмай Эрон Олий раҳбари этиб сайланган. Унинг отаси Али Хоманеий аввал мазкур лавозимни эгаллаган ва 28 февраль куниги ҳужумда ҳалок бўлган.

12 март куни Мўжтаба Хоманеий биринчи мурожаатини йўллаган. Бироқ у чиқишда шахсан иштирок этмаган, мурожаат матн шаклида телевидение ва интернет орқали тарқатилган.

Хорижий оммавий ахборот воситалари аввалроқ Мўжтаба Хоманеийнинг соғлиғи билан боғлиқ муаммолар ҳақида хабар берган эди. Эрон расмийлари унинг АҚШ ҳужуми вақтида жароҳатланганини тасдиқлаган, бироқ жароҳати енгил бўлганини билдирган.