Эрон Ҳормуз бўғозида иккита танкер портлаганини маълум қилди

Ислом инқилоби қўриқчилари корпуси (ИИҚК) навигация қоидаларини бузганидан сўнг Ҳормуз бўғозида иккита танкер портлаганини эълон қилди.

Бу ҳақда Tasnim ахборот агентлиги хабар берди.

ИИҚК кемалар АҚШ ҳарбийлари томонидан мажбурланганидан кейин бўғознинг жанубий қисмида хавфли йўналишда ҳаракатланишга уринганини даъво қилди. Портлашлар натижасида танкерлар саёҳатларини давом эттира олмадилар.

Баёнотда АҚШ кучларининг минтақада мавжудлиги "қонуний кучга эга эмаслиги" ва Эрон АҚШнинг ҳаракатларига қарши жавоб бериш ниятида эканлиги таъкидланган.

Бундан ташқари, ИИҚК АҚШ операциялари тўхтамагунча, Ҳормуз бўғози орқали ўтадиган йўл нефт, газ ва кимёвий моддалар ташийдиган кемалар учун хавфсиз деб ҳисобланмаслиги ҳақида огоҳлантирди.

"Агрессив армия бу ноқонуний қоидабузарлик учун жавоб қайтаришга тайёр бўлиши керак", дейилади баёнотда.

Эслатиб ўтамиз, АҚШ Марказий қўмондонлиги (CENTCOM) аввалроқ Америка кучлари кетма-кет тўққизинчи кеча Эронга ҳужумлар уюштирганини ва уларнинг мақсади Теҳроннинг Ҳормуз бўғозида савдо кемаларига таҳдид солиш қобилиятини заифлаштириш эканлигини маълум қилганини хабар қилган эди.

Ўз навбатида, ИИҚК Вашингтоннинг ҳарбий базаларини жойлаштирган АҚШ ва Яқин Шарқ давлатларини Эрон фуқаролик инфратузилмасига ҳужумлар давом эца, "ўта қаттиқ жазо" билан огоҳлантирди.