Эрон Филиппин нефть кемаларининг Ормуз бўғози орқали хавфсиз ўтишини кафолатлади

Эрон кучайиб бораётган глобал энергетика инқирози фонида Филиппин нефть танкерларининг Ормуз бўғози орқали хавфсиз ўтишини таъминлашга ваъда берди.

Филиппин Ташқи ишлар вазирлиги хабарига кўра, Эрон ташқи сиёсат маҳкамаси раҳбари Филиппин байроғи остида энергия ресурсларини ташиётган кемалар, шунингдек, филиппинлик денгизчилар стратегик жиҳатдан муҳим ҳисобланган ушбу сув йўлидан тўсиқларсиз ва хавфсиз ўтиши мумкинлигига ишонтирган.

Ушбу баёнот Филиппин ёқилғи таъминотини барқарорлаштириш йўлларини фаол излаётган бир вақтда янгради. Мамлакат президенти Фердинанд Маркос-кичик аввалроқ энергетика соҳасида фавқулодда ҳолат эълон қилиб, ҳукумат инқирозни енгиб ўтиш учун ҳар қандай чораларни кўриб чиқишга тайёрлигини таъкидлаган эди.