Эрон бойитилган уран захираларидан воз кечишга рози бўлди

Эрон Қўшма Штатлар билан музокараларда барча бойитилган уран захираларидан воз кечишга рози бўлди.

Бу ҳақда Уммон ташқи ишлар вазири Бадр ал-Бусаиди CBS News телеканалига берган интервьюсида маъулм қилди.

Унинг аниқлик киритишича, бу Вашингтоннинг Теҳронга ядровий битим тузиш бўйича асосий талабларидан бири.

"Ҳозирги захираларга келсак, менимча, энди улар минимал даражада - нейтрал, табиий даражага қайта ишланиши ҳақида келишувга эришилди. Яъни, улар ёқилғига айлантирилади ва бу ёқилғи қайтариб бўлмайдиган бўлади", деди ал-Бусаиди.

Вазирнинг қўшимча қилишича, Эрон МАГАТЭ инспекторларига ўзининг ядровий иншоотларига кириш ҳуқуқини беришга рози бўлган. Унинг таъкидлашича, АҚШ ва Эрон ўртасида келишувга эришиш мумкин, аммо "баъзи тафсилотларни аниқлаштириш учун бироз кўпроқ вақт керак". The Wall Street Journal хабарига кўра, музокаралар давомида АҚШ Эрондан Фордов, Натанз ва Исфаҳондаги ядровий иншоотларини демонтаж қилишни, шунингдек, барча бойитилган уранни экспорт қилишни талаб қилган. Эрон ҳукумати ахборот кенгаши раҳбари Элиас Ҳазрати Эрон "ҳеч нарса экспорт қилмаслигини" ва "мамлакат эҳтиёжларига мувофиқ" уранни бойитишда давом этишини айтди.