Эрон Бош штаби АҚШнинг қуруқликдаги амалиёти бошланишини кутмоқда

Эрон Бош штаби АҚШнинг қуруқликдаги амалиёти бошланишини кутаётганини маълум қилди ва бунинг оқибатларидан огоҳлантирди.

Баёнотда айтилишича, юзма-юз жангларда америкаликлар шундай фалокатга дуч келадики, бундан кейин ҳеч ким АҚШ армиясида хизмат қилишни хоҳламай қолади, амалиётнинг ўзи эса ҳақиқий "жанг майдонига" айланади.

Шунингдек, америкалик аскарлар ҳозирда меҳмонхона ва портларда яшириниб ётгани, аммо қуруқликдаги урушда улар учун ҳеч қандай бошпана қолмаслиги таъкидланган.

Бундан ташқари, Ҳўрмуз бўғози узоқ муддатли истиқболда америкаликлар ва сионистлар учун ёпиқ қолиши ҳамда улар ҳеч қандай ҳолатда бу йўлга киритилмаслиги алоҳида қайд этилган.

Эрон томони Вашингтон можародан чиқиш йўлларини излаётганини, бироқ уларга кетишга йўл қўйилмаслигини билдирди. "Етказилган зарар қопланиши, тажовузкорлар эса жазоланиши керак", дейилади баёнотда.