Эрон билан уруш АҚШга кунига 2 миллиард долларгача тушмоқда

Бу ҳақда глобал можароларнинг иқтисодий зарарини ўрганадиган экспертлар BBC'га маълум қилди.

Браун университетининг “Уруш харажатлари” лойиҳаси директори Стефани Сaвелнинг айтишича, қурол-яроғ, ҳарбий харажатлар, АҚШ активларига етган зарар ва бошқа қатор омилларни ҳисобга олганда, уруш аллақачон америкаликларга ўнлаб миллиард доллар зарар етказган.

Пентагон март ойи бошида урушнинг олти куни Конгрессга 11,3 миллиард долларга тушганини маълум қилганди. Бироқ Сaвел реал рақамлар бундан анча юқори эканини айтмоқда.

Гарвард университетининг мудофаа бюджети бўйича эксперти Линда Блаймс ҳам урушнинг кунлик харажатлари аллақачон 2 миллиард доллар атрофида эканини таъкидлади.

Савелнинг таъкидлашича, бундай катта харажатлар охир-оқибат оддий америкаликлар зиммасига тушади. Уруш аллақачон Қўшма Штатларда бензин нархларнинг ошишига сабаб бўлган. Бундан ташқари, инфлясия, бизнесдаги ноаниқлик ва суғурта харажатларининг ошиши кутилмоқда.

Оқ уй уруш ҳаракатларини давом эттириш учун яна 200 миллиард доллар сўраган. Савел бу рақамни “жуда катта сумма” деб атади.