Эрон АҚШгача етадиган ракеталар ишлаб чиқараётгани ростми?

Эрон Ташқи ишлар вазири Аббос Ароқчи Теҳрон АҚШгача етиб боришга қодир бўлган ракеталарни ишлаб чиқаётгани ҳақидаги маълумотни рад этди.

Аввалроқ АҚШ президенти Дональд Трамп Эрон Европага етиб борадиган ракеталарни аллақачон ишлаб чиққанини ва гўёки АҚШгача учиб борадиган ракеталар устида ишлаётганини даъво қилган эди. "Бу сохта хабарлар (фейк)", — деди Ароқчи "India Today" телеканалига берган интервьюсида.

Вазирнинг сўзларига кўра, Эрон ракеталар учиш масофасини онгли равишда икки минг километр билан чеклаган. Ракеталарнинг ўзи эса, деб қўшимча қилди Ароқчи, мудофаа ва тийиб туриш мақсадларида ишлаб чиқилган бўлиб, глобал хавф туғдирмайди.