Эрон АҚШ билан давом этаётган урушни чўзиш вариантини кўриб чиқмоқда

Эрон АҚШ билан давом этаётган урушни Трампнинг президентлик муддати якунлангунга қадар чўзиш вариантини кўриб чиқмоқда.

Бу ҳақда Эрон Ислом инқилоби қўриқчилари корпуси бош қўмондони маслаҳатчиси, бригада генерали Муҳаммад Ризо Нақдий PBS телеканалига берган интервюсида маълум қилди.

Унинг айтишича, Теҳроннинг асосий мақсади Эронга қарши янги ҳужумларнинг олдини оладиган даражадаги тийиб туриш механизмини яратишдан иборат.

"Қаранг, душман ҳеч қачон бизга ҳужум қилишга журъат эта олмайдиган даражадаги тийиб туриш омилига эришишимиз керак. Бунинг йўлларидан бири – бу урушни кейинги президентлик муддатигача чўзиш ва шундай зарар етказишки, агар яна кимдир Эронга ҳужум қилишни истаса, бунинг учун катта бадал тўлашига тўғри келишини билсин", — деди генерал.

Нақдийга Эроннинг савдо кемаларига ҳужумлари халқаро денгиз ҳуқуқини бузиши мумкинлиги ҳақида савол берилганда, у уруш шароитида хавф туғдирувчи транспорт йўлларини назорат қилиш қонуний эканини таъкидлади.

"Уруш шароитида биз таҳдид солувчи ҳар қандай транспорт артериясини назорат қилишимиз мумкин. Халқаро ҳуқуқ айнан шуни назарда тутади. Дунёнинг қайси нуқтасида уруш бўлса, шу қоида амал қилади", — деди у.

Маълумот учун, Доналд Трампнинг иккинчи президентлик муддати 2025 йил январда бошланган бўлиб, 2029 йил 20 январда якунланади. АҚШ Конституциясининг 22-тузатишига кўра, бир шахс икки мартадан ортиқ президент лавозимини эгаллай олмайди.