Ереван аэропортида математик Михаил Вербицкий қўлга олинди

Россияда у урушни танқид қилгани учун "террорчиликка даъват қилиш"да айбланмоқда

Бу ҳақда "Дождь", РБК ва "Известия" нашрлари Арманистон полициясига таяниб хабар бермоқда.

Ички ишлар вазирлиги маълумотларига кўра, Россия фуқароси "Звартноц" аэропортида ҳибсга олинган.

Вербицкий 2015 йилгача Иқтисодиёт олий мактабида (ВШЭ) дарс берган ва машҳур блог юритган. Шундан сўнг у Россиядан эмиграция қилиб, Бразилияда ишлай бошлаган. 2025 йилда Россия расмийлари уни "террорчилар ва экстремистлар" рўйхатига киритган, кейинчалик эса қидирувга берган.

ТАСС хабарига кўра, унга нисбатан террорчиликка даъват қилиш моддаси бўйича жиноят иши қўзғатилган. Ушбу модда бўйича у етти йилгача озодликдан маҳрум этилиши мумкин. Вербицкий Россиянинг Украинага ҳужумини кескин танқид қилган ва "Крокус Сити Холл"даги террорчилик ҳаракатининг расмий талқинига шубҳа билдирган эди.