Кеча АОКАда Халқ таълими вазирлиги ахборот хизмати раҳбари Лайло Рустамова иштирокида бўлиб ўтган брифингда Ўзбекистонда 1-синфга қабул учун 3 та мактабни танлаш имконияти берилиши маълум қилинган.
Лайло Рустамованинг таъкидлашича, биринчиси ота-она доимий истиқомат қилаётган ҳудуддаги, яъни яшаш манзили бириктирилган микроҳудуддаги мактаб бўлса, иккинчи ва учинчиси ота-оналарнинг ихтиёрий танлови асосида фарзандларини қатнаши учун қулай бўлган мактаблар ҳисобланади.
«Ота-оналар 2021 йилнинг 6 июлидан 31 июлга қадар электрон плафторма орқали танлаган биринчи мактабга, яъни бириктирилган микроҳудуддаги мактабга ҳужжатларини топширади. Бунда ҳужжатларни топшириш тўлиқ электрон шаклда амалга оширилади. Шунингдек, доимий яшаш манзили бўйича бириктирилган микроҳудуддаги мактабга жойлашиш кафолатланади», — деган Халқ таълими вазирлиги ахборот хизмати раҳбари.
Шунингдек, у агар ота-оналар микроҳуддуддаги мактабни эмас, электрон рўйхатдан ўтиш вақтида танлаган иккинчи ёки учинчи мактабларнинг бирида бўш ўринлар бўлган тақдирда 1–15 август кунлари ҳужжатларини топшириши мумкинлигини қайд этган.
