Дональд Трамп Путин билан “бефойда учрашув”ни истамаслигини айтди

АҚШ президенти Дональд Трамп Россия президенти Владимир Путин билан “бефойда учрашув” ўтказиш ниятида эмаслигини маълум қилди ҳамда икки томонлама саммитнинг кечиктирилишига изоҳ берди.

Оқ уйда бўлиб ўтган тадбирда журналистлар саволларига жавоб берган Трамп Путин билан Будапештда режалаштирилган, аммо кейинга қолдирилган учрашув ҳақида гапирди.

“Мен маъносиз учрашув ўтказмоқчи эмасман, вақтимни беҳуда сарфламоқчи эмасман”, — деди у учрашувнинг кечиктирилиши сабабини изоҳлар экан.

Шу билан бирга, президент музокаралар учун имконият ҳали ҳам мавжудлигини таъкидлади:

“Биз ҳали якуний қарорга келганимиз йўқ”, — деди давлат раҳбари.

Трамп учрашув бекор қилинганига оид саволларга “мен бу ҳақда ҳеч нима демаганман” деб жавоб берди.

“Мен бундай бўлишини айтмаганман. Нима бўлишини ҳеч қачон билмайсиз. Режаларимизни яқин икки кун ичида эълон қиламиз”, — деди Америка президенти.

Шунингдек, Трамп Россия ва Украина ўртасида о‘t очишни тўхтатиш имкони ҳали ҳам мавжудлигини қайд этди.

Ўтган ҳафта АҚШ президенти Путин билан Будапештда учрашиб, Россия ва Украина ўртасидаги можарога барҳам бериш йўлларини муҳокама қилишга тайёр эканини билдирган эди.

Кеча Оқ уй маълум қилишича, Трамп ва Путин ўртасидаги саммит яқин вақт ичида режалаштирилмаган.

“Давлат котиби Марко Рубио ва Россия ташқи ишлар вазири Сергей Лавров самарали учрашув ўтказдилар. Улар ўртасида навбатдаги юзма-юз музокаралар зарур эмас ва президент Трамп яқин вақт ичида президент Путин билан учрашувни режалаштирмаяпти”, — деди АҚШ маъмурияти вакили “Anadolu” агентлигига.