Дания АҚШ санкциялари остидаги Эрон кемасини ҳибсга олди

Дания расмийлари 18 февраль куни ўз байроғини Комор оролларидан Эрон байроғига ўзгартирган Nora контейнер кемасини Каттегат бўғозида ҳибсга олди.

Бу ҳақда Дания денгиз бошқармаси маълум қилди.

Marine Traffic хабар беришича, кема бир неча ой олдин қайта номланган ва унинг аввалги номи Cerus бўлган. Контейнер кемаси АҚШ Молия вазирлигининг Эронга қарши санкциялар рўйхатида. Кема Санкт-Петербургдан сузиб кетаётган эди.

13 январь куни кема Даниянинг Скаген шаҳридан ўтиб, Санкт-Петербургга йўл олди ва у ерда геолокацияни узатишни тўхтатди. Жойлашув маълумотлари 16 январь куни кема Болтиқ денгизи орқали сузиб кетаётган пайтда яна пайдо бўлди. 22 январь куни контейнер кемаси Скагеннинг шимолий қисмига етиб келди, кейин Каттегат бўғозига йўл олди ва у ерда 25 кун лангар ташлаб қўйди.

Дания расмийларига кўра, кема нотўғри рўйхатдан ўтган. "Комор ороллари Дания денгиз бошқармасига кема уларнинг реестрида рўйхатдан ўтмаганлиги ҳақида хабар беришди", дейилади агентлик баёнотида. Контейнер кемаси Дания расмийлари рўйхатдан ўтиш сертификатларини олмагунча ҳибсга олинади.