Буюк Британияда чўчқа гриппининг A(H1N2)v штамми билан одамда биринчи касалланиш ҳолати аниқланди.
Буюк Британия Соғлиқни сақлаш хавфсизлиги агентлиги маълумотларига кўра, ушбу вирус билан касалланиш ҳолати мунтазам мониторинг давомида аниқланган. Нафас олиш йўллари инфекциясининг белгилари пайдо бўлгандан кейин бемор шифокорга мурожаат қилган.
2005 йилдан бери бутун дунё бўйлаб одамларда A (H1N2)v штамми билан касалланган 50 та ҳолат қайд этилган. Буюк Британияда аниқланган янги ҳодиса биринчи тур бўлиб, аввалги ҳолатларга генетик жиҳатдан боғлиқ эмас.
Грипп A(H1N2)v вируси чўчқаларда айланиб юрадиган вирусларга ўхшайди. Буюк Британиянинг Соғлиқни сақлаш хавфсизлиги агентлиги касалликнинг янги тури ҳақида Жаҳон соғлиқни сақлаш ташкилотини расман хабардор қилган. Ушбу штамм қанчалик юқумли экани ҳали аниқ эмас.
H1N1, H1N2 ва H3N2 чўчқа гриппи А вирусларининг асосий кичик типлари бўлиб, чўчқаларда яшайди ва вақти-вақти билан одамларга юқади. 2009 йилда, одатда чўчқа гриппи деб аталган H1N1 вируси туфайли инсонларда пандемия тарқалди. Энди вирус мавсумий равишда одамлар орасида тарқалади.
