Британия Россиянинг «соя флоти» танкерини қўлга олди

Кир Стармер Ла-Маншдаги танкернинг қўлга олиниши операциясини Россияга берилган «яна бир зарба» деб атади.

Буюк Британия Қуролли кучлари якшанба куни эрталаб Ла-Манш бўғозида Камерун байроғи остида ҳаракатланган, Россиянинг «соя флоти»га мансуб нефть танкерини тўхтатиб, ўз назоратига олди. Бош вазир Кир Стармернинг сўзларига кўра, бу операция Москвага берилган «навбатдаги зарба» бўлди.

The Guardian нашрининг хабар беришича, олти соат давом этган ва Буюк Британия бошчилигида ўтказилган илк шундай операция чоғида Қироллик денгиз пиёдалари командослари ҳамда Жиноятчиликка қарши кураш миллий агентлиги ходимлари Smyrtos танкерига чиқиб, унинг устидан назорат ўрнатган.

Ҳозирда нефть танкери Дорсет қирғоқлари томон йўл олмоқда ва у ерда лангарга қўйилади. Кема экологик меъёрлар ҳамда хавфсизлик талабларига риоя этилиши нуқтаи назаридан мутахассислар назорати остида сақланади.

Британия расмийларининг таъкидлашича, Smyrtos Россияга қарши санкциялар остидаги нефтьнинг 75 фоизини ташишда қатнашган 700 та кемадан иборат «соя флоти» таркибига киради.

Стармернинг айтишича, у танкер Ла-Манш бўғозига киришга уринган пайтда уни қўлга олиш бўйича буйруқни шахсан берган. Бунгача Қироллик Қуролли кучлари Атлантика океанида ўтказилган шунга ўхшаш тадбирларда фақат Франция ҳарбийларига кўмаклашиб келган.

«Бу муваффақиятли операция Россияга яна бир зарба беради ва урушни молиялаштираётганларга биз уларга яшириниш имконини бермаслигимизни эслатади», — деди Буюк Британия бош вазири, операцияда қатнашган ҳарбийлар ва ҳуқуқни муҳофаза қилиш органлари ходимларига миннатдорлик билдириб.