Божхона декларациясини энди онлайн тўлдириш мумкин

Ўзбекистонда йўловчи божхона декларациясини расмийлаштириш жараёни рақамлаштирилди.

Энди мамлакатга кириб келаётган ёки хорижга чиқаётган фуқаролар декларацияни чегара постига етиб бормасдан туриб MyGov иловаси ёки my.gov.uz портали орқали онлайн тўлдириши мумкин.

Электрон шаклда тайёрланган ҳужжат телефонда сақланади ва чегарадан ўтиш пайтида божхона ходимига тақдим этилади. Бу декларацияни жойида қайтадан тўлдиришга сарфланадиган вақтни қисқартириш имконини беради.

Хизмат орқали олиб кирилаётган ёки олиб чиқилаётган валюта, мобил телефон ва бошқа қурилмалар, заргарлик буюмлари ҳамда шахсий эҳтиёж учун мўлжалланган товарлар ҳақидаги маълумотларни олдиндан киритиш мумкин.

Амалдаги тартибга кўра, товарларнинг қиймати белгиланган божсиз меъёрдан ошса, улар декларация қилиниши шарт. Божсиз олиб кириш лимити самолётда 1 минг доллар, темир йўл ва дарё транспортида 500 доллар, автомобиль ёки пиёда тартибда чегарадан ўтилганда эса 300 доллар этиб белгиланган.

Шунингдек, 100 миллион сўм эквивалентидан ортиқ нақд миллий ёки хорижий валюта, белгиланган меъёрдан ортиқ заргарлик буюмлари, айрим дори воситалари ва махсус назоратдаги товарлар ҳам декларация қилиниши керак.

Белгиланган лимитдан ортиқ қисми учун амалдаги тартибда божхона тўловлари ундирилади.