БМТ АҚШнинг Венесуэла нефтини блокадаси қонунийлигини текширмоқда

Айни пайтда БМТ АҚШ президенти Дональд Трамп маъмуриятининг Венесуэлага нисбатан ҳаракатларига, хусусан, Боливар Республикасига ва ундан чиқувчи нефть танкерларини блокировка қилишга нисбатан қўлланиладиган ҳуқуқий базани кўриб чиқмоқда.

Бу ҳақда БМТ раҳбари матбуот котиби ўринбосари Фархон Ҳақ маълум қилган.

"Ҳозирги босқичда биз амалдаги қонунларни ўрганяпмиз ва вазиятнинг ўзини ўрганяпмиз. Шубҳасиз, томонлар БМТ Низомига риоя қилишлари керак", деди у масала юзасидан берилган саволга жавоб берар экан.

Эслатиб ўтамиз, аввалроқ Трамп Венесуэлага ва ундан чиқиб кетаётган барча санкцияланган танкерларни блокировка қилишга буйруқ берганини маълум қилганди. Truth Social ижтимоий тармоғидаги постида Америка етакчиси Венесуэла ҳукуматини "хорижий террорчи ташкилот" сифатида тан олишини қўшимча қилди.