Арағчи: "АҚШ билан кутилаётган урушнинг олди олиниши мумкин"

Теҳрон Қўшма Штатлар билан уруш муқаррар эмас ва унинг олдини олиш мумкин, деб ҳисоблайди.

Эрон ташқи ишлар вазири Аббос Арағчи бу ҳақда CNN телеканалига берган интервьюсида маълум қилди.

Эрон ташқи ишлар вазирининг сўзларига кўра, мамлакат урушга тўлиқ тайёр, аммо бу Теҳрон урушни хоҳлайди дегани эмас: "Аксинча, биз ундан қочишни хоҳлаймиз".

Арағчининг таъкидлашича, Эрон музокараларда Қўшма Штатларга ишончини йўқотган.

"Сабаби аниқ. Аввалги йилларда биз ядровий келишув бўйича музокаралар олиб борган эдик, аммо Қўшма Штатлар ҳеч қандай асоссиз чиқиб кетди. Агар ўтган йилга назар ташласак, музокараларни бошлашга қарор қилганимизда, аввал Исроил, кейин Қўшма Штатлар бизга ҳужум қилди. Шунинг учун бизда америкаликлар билан ижобий тажриба йўқ. Музокаралар "ҳақиқий" бўлиши учун бу ишончсизликка барҳам бериш керак", деб таъкидлади Эрон ташқи ишлар вазири.

Унинг таъкидлашича, Эрон ўзининг ядровий дастури бўйича музокаралар олиб боришга ва уларнинг тўлиқ тинчликсевар бўлишига кафолат беришга тайёр.

"Биз тинчликсевар ядровий дастуримизга ишончни мустаҳкамлашга ва бунинг эвазига санкцияларнинг бекор қилинишини кутамиз", деди у.