АҚШнинг иқтисодий таҳдидлари тескари натижа бермоқда

АҚШ президенти Дональд Трамп маъмурияти Эронга нисбатан худди Хитой билан савдо урушида қўлланган тактикани — баландпарвоз таҳдидлар ва куч намойиш этиш орқали «максимал босим» ўтказиш усулини қўллашга ҳаракат қилмоқда. Бироқ бу кутилганининг акси бўлган натижани бермоқда.

Бу ҳақда CNN телеканали хабар бермоқда.

Таъкидланишича, Теҳрон Вашингтонга ён беришга шошилмаяпти. АҚШнинг бошқа қатор савдо шерикларидан фарқли ўлароқ, Эрон жаҳон нефть маҳсулотларининг 20 фоизи ўтадиган муҳим артерия — Ҳўрмуз бўғози устидан назоратни ўзининг асосий козири (устунлиги) деб ҳисоблайди.

Бозорларнинг Трамп томонидан бўғозни блокада қилиш ҳақидаги таҳдидларига бўлган муносабати иқтисодий қўрқитиш тактикаси тескари натижа бераётганини кўрсатди: Brent маркали нефть нархи зудлик билан 8 фоизга кўтарилди, таҳлилчилар эса қарама-қаршилик чўзилиб кетган тақдирда нархлар баррелига 120 долларгача чиқиши мумкинлигидан огоҳлантирмоқда.

АҚШ ичида бу жараён аллақачон фуқаролар ҳамёнига таъсир қила бошлади: Moody's маълумотларига кўра, Америкадаги уй хўжаликлари бир йил олдингига нисбатан ҳар ойда ўртача 233 доллар кўпроқ маблағ сарфламоқда.

Телеканалнинг қайд этишича, Теҳрон Пекин тажрибасидан сабоқ чиқарган кўринади ва қатъий позицияни эгаллаган. Эрон парламенти спикери Муҳаммад Бақир Қолибоф Ҳўрмуз бўғозининг блокада қилиниши фақат бензин нархини оширишини ва бу энг аввало америкаликларнинг ўзлари учун ёқилғини камроқ ҳамёнбоп қилиб қўйишини очиқ таъкидлади.