АҚШ федерал суди қора танли фермерларнинг қарзларини коронавирус пандемиясига қарши курашиш учун режалаштирилган жамғарма ҳисобидан тўлашни вақтинча тақиқлади. Ирқий тенгсизликни йўқ қилиш дастури қишлоқ хўжалигида пул ишлаб топган оқ танли ишбилармонларнинг даъволари сабабли тўхтатилди, деб ёзади Associated Press.
Висконсин штатида Милуокидаги округ судьяси Уилям Гризбах 10 июнь куни буйруқ чиқариб, қора танли фермерларни қўллаб-қувватлашга қаратилган янги дастурни вақтинча тўхтатиб қўйди ва камситишлардан шикоят қилган оқ танли фермерлар томонига ўтди.
АҚШ Президенти Жо Байден маъмуриятининг дастурига кўра, пандемия оқибатларини бартараф этиш учун фонддан тўрт миллиард (1,9 триллион доллар) қора танлилар, америкалик ҳиндулар, испанлар, осиёлик америкаликларга берилган қишлоқ хўжалиги кредитларини тўлаш учун ажратилиши режалаштирилган эди. Озчиликни ташкил этувчи фермерлар ўнлаб йиллар давомида уларга ҳукумат ёрдами ва қарзларидан адолатсиз равишда маҳрум қилинаётганликлари ҳақида баҳс юритиб келмоқдалар.
Wisconsin Institute for Law and Liberty юридик фирмаси оқ танли фермерларнинг ҳуқуқларини ҳимоя қилиб, 2021 йил апрель ойида судга даъво аризаси билан мурожаат қилди. Инсон ҳуқуқлари фаоллари озчиликлар олдидаги қарзлардан кечиш Висконсин, Миннесота, Жанубий Дакота, Миссури, Айова, Арканзас, Орегон ва Кентукки фермерлари учун адолатсиз эканлигини таъкидламоқда. АҚШ банклари, ўз навбатида, йўқолган фоизли даромадлари учун давлатдан қўшимча товон пули кутгунча қора танли фермерларга пул тўлашдан бош тортдилар.
