АҚШда қор бўрони оқибатида 30 киши ҳалок бўлди

Аввалроқ бўрон қурбонлари сони 11 киши экани хабар қилинган эди.

Associated Press'нинг хабар беришича, ҳалок бўлганлар орасида Массачусетс ва Огайо штатларидан бўлган икки киши бор. Уларни қор тозалаш машиналари уриб юборган. Шунингдек, Арканзас ва Техас штатларидаги чана учаётган ўсмирлар ҳам вафот этган.

Маълум қилинишича, Нью-Йоркда 38 сантиметргача, Питтсбург шимолидаги ҳудудларда эса 50 сантиметргача қор ёққан.

Хабар берилишича, қор бўрони Қўшма Штатларда 200 миллиондан ортиқ одамга таъсир кўрсатган. Ноқулай об-ҳаво туфайли миллиондан ортиқ хонадон электрсиз қолган. Йўлларда музлаш юз берди, бу эса авариялар сонининг ошишига олиб келган.

Шунингдек, 20 мингдан ортиқ авиапарвозлар бекор қилинган ёки кечиктирилган.