АҚШда Mercedes автомобиллари савдоси тақиқланиши мумкин

АҚШ Сенатига киритилган янги қонун лойиҳаси Mercedes-Benz учун жиддий муаммо туғдириши мумкин. Бу ҳақда Reuters нашри хабар берди.

Унга кўра, агар автомобиль ишлаб чиқарувчисининг 15% дан ортиқ улуши хитойлик инвесторларга тегишли бўлса, унинг автомобилларини АҚШга импорт қилиш, ишлаб чиқариш ва сотиш тақиқланиши мумкин.

Ҳозирда Mercedes акцияларининг қарийб 10%и Хитойнинг BAIC компаниясига, яна 10% га яқини хитойлик тадбиркор Ли Шуфуга тегишли.

Бироқ Mercedes бу қонун уларга татбиқ этилмаслигини таъкидламоқда. Компания изоҳига кўра, ҳеч бир хитойлик акциядор алоҳида ҳисобда 10% дан ортиқ улушга эга эмас, улар кузатув кенгашида ҳам қатнашмайди ва компания бошқарувига таъсир кўрсата олмайди.

Mercedes, шунингдек, АҚШ иқтисодиётидаги ўрнини ҳам эслатди. Компания фаолияти мамлакатда 160 мингга яқин иш ўрнини қўллаб-қувватлайди. Жумладан, Алабама ва Жанубий Каролина штатларидаги заводлар минглаб америкаликларни иш билан таъминлайди.

Қонун лойиҳаси Сенатнинг Савдо, фан ва транспорт қўмитасида муҳокама қилинмоқда. Республикачи сенатор Тед Круз 15% лик мезонни бутунлай бекор қилишни таклиф қилди.

Унинг фикрича, бу кўрсаткич АҚШнинг General Motors компанияси фойдасига Германиянинг Mercedes компаниясига босим ўтказиш учун танлангандек кўринади.

Шу билан бирга, қонун ташаббускорлари Mercedes савдосини тақиқлашни мақсад қилмаганини айтмоқда. Сенатор Берни Моренонинг сўзларига кўра, автомобиль ишлаб чиқарувчилар зарур ҳолларда АҚШ Савдо вазирлигидан истисно тариқасида рухсат сўраши мумкин.

АҚШ Mercedes учун иккинчи энг йирик бозор ҳисобланади. Қонун лойиҳаси интернетга уланган автомобилларга, яъни GPS, Wi-Fi ёки мобил алоқа тизимларига эга машиналарга тааллуқли.

АҚШ расмийлари бундай автомобиллар орқали йиғилган маълумотлар Хитой ҳукумати қўлига тушиши мумкинлигидан хавотирда.

Шу сабабли янги қоидалар Volkswagen ва БМWга ҳам таъсир қилиши эҳтимолдан холи эмас, чунки улар ҳам хитойлик етказиб берувчилар билан яқин ҳамкорлик қилади.