АҚШ Хитойга нисбатан виза санкцияларини қўлламоқчи

Бунга сабаб қилиб мигрантларни қайтаришдан бош тортаётгани кўрсатилмоқда.

Қўшма Штатлар маъмуриятининг юқори лавозимли вакили Хитой ҳукумати мамлакатда ноқонуний равишда бўлиб турган ўз фуқароларини ортга қайтариш жараёнини секинлаштираётганини айтди.

Унинг сўзларига кўра, агар Пекин ушбу масалада ҳамкорликни кучайтирмаса, Вашингтон виза беришни тез-тез рад этиш, виза учун гаров суммасини ошириш ва чегарада киришни блоклаш каби чекловларни жорий этишга тайёр. Ушбу огоҳлантириш президент Доналд Трампнинг 14–15 май кунлари Пекинга режалаштирилган ташрифи ва Си Жинпин билан бўладиган учрашуви арафасида маълум қилинди.

​Ҳозирги вақтда АҚШда 100 000 дан ортиқ ноқонуний равишда яшаб келаётган хитойлик мигрант мавжуд бўлиб, уларнинг 30 000 нафардан ортиғи бўйича депортация қилиш ҳақида якуний қарор чиқарилган. Вашингтон расмийлари Пекинни депортация қилинадиган шахслар учун йўл ҳужжатларини беришни атайлаб кечиктиришда ва бу масаладан Қўшма Штатларга босим ўтказиш учун дастак сифатида фойдаланишда айбламоқда.

Маълумотларга кўра, Пекин депортация жараёнини АҚШга қочиб кетган ўз сиёсий ёки иқтисодий жиноятчиларини топшириш қилиш шарти билан боғлашга уринмоқда. Хитой элчихонаси ушбу вазиятга ҳали расмий муносабат билдирмаган.

Аввалроқ Пекин ноқонуний миграцияга қарши эканини ва бу муаммо халқаро ҳамкорлик орқали ҳал этилиши кераклигини таъкидлаган эди. АҚШ қонунчилигига кўра, репатриация сўровларини бажаришдан бош тортган мамлакатларга нисбатан виза санкцияларини қўллаш ҳуқуқига эга бўлиб, Ички хавфсизлик вазирлиги Хитойни мунтазам равишда шундай давлатлар рўйхатига киритиб келади.