АҚШ ва Украина Майамида янги музокаралар ўтказиши мумкин

Вашингтон ва Киев музокараларнинг навбатдаги раундини шу ҳафта охирида "Қўшма Штатларнинг бирор жойида", эҳтимол Майамида ўтказиши мумкин.

Бу ҳақда АҚШ расмийсига таяниб, Axios нашри хабар берди.

Музокараларда икки давлат ишчи гуруҳлари ва ҳарбий хизматчилар иштирок этади. Делегациялар "хариталарни ўрганади", деди расмий.

15 декабрь куни тушдан кейин Берлинда Украина президенти Владимир Зеленский, АҚШ президентининг махсус вакили Стивен Уиткофф ва АҚШ етакчисининг куёви Жаред Кушнер ўртасидаги музокараларнинг иккинчи раунди бўлиб ўтди. Биринчи учрашув бир кун олдин бўлиб ўтди ва беш соатдан ортиқ давом этди.