АҚШ илк марта Венесуэла ҳудудидаги порт иншоотига зарба берди

АҚШ илк марта Венесуэла ҳудудидаги порт иншоотига зарба берди. Бу ҳақда CNN хабар берди.

Телеканалнинг вазиятдан хабардор манбаларига кўра, АҚШ Марказий разведка бошқармаси (CIA) дрони Венесуэла соҳилидаги портлардан бирига зарба берган. Бу Қўшма Штатларнинг ушбу мамлакат ҳудудидаги нишонга берган илк ҳужуми бўлди.

CNN суҳбатдошларининг айтишича, АҚШ ҳукумати мазкур портдан Tren de Aragua жиноий гуруҳи гиёҳванд моддаларни сақлаш ва уларни кейинчалик жўнатиш учун кемаларга ортишда фойдаланганига оид маълумотларга эга бўлган.

Манбаларнинг таъкидлашича, зарба берилган пайтда объект ҳудудида ҳеч ким бўлмаган, шу сабабли жабрланганлар йўқ. Авваллароқ президент Доналд Трамп АҚШ “Венесуэладаги йирик объект”ни йўқ қилганини айтган эди. Душанба куни Трампдан бу ҳақда яна сўралганда, у АҚШ “кемаларга гиёҳванд моддалар юкланадиган бандаргоҳ ҳудудида” ҳужум уюштирганини билдирди. Бироқ ҳужум ҳақида батафсил маълумот беришдан бош тортди.

Сўнгги пайтларда АҚШ Кариб денгизи ва Тинч океанининг шарқий қисмида 30 дан ортиқ кемани йўқ қилди. Вашингтон буни гиёҳвандликка қарши кураш кампанияси билан изоҳлади. Трамп, шунингдек, Венесуэладаги наркокартелларга қуруқликдан зарбалар бериш билан бир неча бор таҳдид қилган.