АҚШ Эронга кетаётган кемага ҳужум қилди

АҚШ кучлари Уммон кўрфазида Эронга кетаётган Палау байроғи остидаги нефть танкерига ҳаво ҳужуми уюштирди.

Бу ҳақда АҚШ Марказий қўмондонлиги (CENTCOM) ижтимоий тармоқларда эълон қилди.

Маълумотларга кўра, зарба "кеманинг мавжуд блокадани бузишга уринишидан кейин" содир бўлган.

"Палау байроғи остидаги M/T Marivex танкери 8 июнь куни халқаро сувлар орқали Эрон портига қараб йўл олган эди. Экипаж АҚШнинг йўналишни ўзгартириш талабларини эътиборсиз қолдиргандан сўнг, USS Abraham Lincoln (CVN-72) авиаташувчисидан Boeing F/A-18E/F Super Hornet қирувчи самолёти кеманинг двигатель ва руль бўлинмаларига аниқ зарба берди", дейилади баёнотда.

АҚШ қўмондонлиги баёнотида таъкидланишича, 13 апрелда блокада жорий этилганидан бери АҚШ ҳарбийлари еттита кемани ишдан чиқарган, "талабларга жавоб берган" 134 та кемани йўналтирган ва гуманитар ёрдам олиб кетаётган 42 та кеманинг ўтишига рухсат берган.