Apple компанияси жаримага тортилди

Британия Россияга қарши санкцияларни бузгани учун Apple компаниясини 390 минг фунт жаримага тортди.

Буюк ​Британия молия идорасининг расмий сайтида эълон қилинган хабарда айтилишича, жаримани АҚШ технологик гигантининг Ирландияда рўйхатдан ўтган бўлинмаси – "Apple Distribution International Limited" (ADI) компанияси тўлаши шарт.

​Ушбу жазо чораси ADI томонидан 2022 йилнинг июн ва июл ойларида Россиянинг "Okko" стриминг сервисига ўтказилган умумий қиймати қарийб 636 минг фунтлик иккита тўлов учун қўлланди.

​Британия ҳукумати маълумотига кўра, "Okko" Россиянинг "Новые возможности" компаниясига тегишли бўлиб, 2022 йил майига қадар унга давлатга қарашли "Сбербанк" эгалик қилган. Лондон Украинадаги уруш сабабли ҳар иккала тузилмага нисбатан Apple тўловларини амалга оширгунига қадар санкциялар жорий этиб бўлган эди.

​Эслатиб ўтамиз, 2024 йил январида Apple бозордаги монопол мавқеини суиистеъмол қилиш айби билан Россия бюджетига 12,3 млн доллар миқдорида жарима тўлаган эди.