Америка ОАВ: Трамп–Путин учрашуви қолдирилиши мумкин

АҚШ президенти Дональд Трамп ва Россия президенти Владимир Путиннинг Венгрия пойтахти Будапештда ўтказилиши режалаштирилган учрашуви қолдирилиши мумкин. Бу ҳақда CNN телеканали манбаларига таяниб хабар берди.

Оқ уй матбуот котибининг CNN телеканалига маълум қилишича, АҚШ давлат котиби Марко Рубио ва унинг россиялик ҳамкасби Сергей Лавров ўртасида кутилган учрашув ҳам ҳозирча қолдирилган. Унга кўра, бекор қилиш сабаблари очиқланмаган, бироқ манбалардан бири томонларнинг Россия–Украина можаросининг ечими бўйича турлича қарашларга эга эканини таъкидлаган.

Манба қайд этишича, мазкур келишмовчиликлар туфайли Рубио келаси ҳафта Трамп ва Путин учрашувини тавсия этиши эҳтимолдан йироқ эмас. Шу билан бирга, икки давлатнинг дипломатик раҳбарлари шу ҳафта яна бир марта телефон орқали мулоқот ўтказиши мумкинлиги айтилган.

Трамп ва Путин Будапештда учрашиши кутилмоқда

16 октябрь куни АҚШ президенти Трамп Россия президенти Путин билан тахминан икки ярим соат давом этган телефон суҳбати ўтказган. Суҳбат давомида асосан Украинадаги можаро ва унинг ечимлари муҳокама қилинган.

Оқ уй раҳбари суҳбатдан сўнг икки давлат ўртасида АҚШ давлат котиби Марко Рубио иштирокида “юқори даражадаги маслаҳатчилар учрашуви” бўлиб ўтиши, шундан кейин эса Вeнгрия пойтахти Будапештда Путин билан шахсан учрашиши режалаштирилганини айтган.

Трампнинг таъкидлашича, у ва Путин ўртасидаги бу учрашув “икки ҳафта ичида бўлиб ўтиши мумкин.”