“Адолат” СДП масъулларга фуқароларнинг шахсий маълумотлар хавфсизлиги юзасидан сўров юборди

Олий Мажлис Қонунчилик палатасидаги “Адолат” СДП фракцияси Ўзбекистон фуқароларининг шахсий маълумотлари “Darknet” ва бошқа очиқ интернет ресурсларига сизиб чиққан бўлиши мумкинлиги ҳақидаги хабарлар юзасидан масъул давлат органларига депутатлик сўрови юборди.

Маълум қилинишича, партия депутати Маҳмуд Валиев мазкур ҳолатнинг фуқароларнинг ҳуқуқий ҳамда молиявий хавфсизлигига таҳдид солаётганини инобатга олган ҳолда Рақамли технологиялар вазири, Ички ишлар вазири ва Миллий статистика қўмитаси раисига тегишли сўровлар йўллаган.

Депутатлик сўровларида шахсий маълумотлар ҳимояси ҳолати, эҳтимолий киберҳужум сабаблари, тезкор-қидирув ишлари, шунингдек, келгусида бундай ҳолатлар такрорланмаслиги учун кўрилаётган техник ва ташкилий чоралар юзасидан маълумот бериш сўралган.