Абдуқодир Ҳусанов дунёнинг энг кучли U-21 вундеркидлари топ-10 талигидан жой олди

FMInside нашри томонидан тузилган 21 ёшгача бўлган энг кучли вундеркидлар рейтингида Ўзбекистон терма жамоаси ва “Манчестер Сити” ҳимоячиси Абдуқодир Ҳусанов 10-ўринга жойлаштирилди.

Рейтингда Ҳусановнинг умумий рейтинги 75, потенциали эса 87 деб баҳоланган. Шунингдек, унинг трансфер қиймати 63 миллион евродан 119 миллион еврогача деб кўрсатилган.

Рўйхатда биринчи ўринни Ламин Ямал эгаллаган бўлиб, “Барселона” юлдузининг потенциали 97 деб баҳоланган. Кейинги ўринлардан Жоау Невеш, Дезире Дуэ, Кенан Йилдиз ва Гави каби ёш юлдузлар жой олган.

Шу тариқа, Абдуқодир Ҳусанов дунё футболидаги энг кучли 21 ёшгача бўлган футболчилар орасида топ-10ликка кирди ва ундан юқорида фақат тўққиз нафар футболчи қайд этилди.