10 йил ва ундан кўпроққа ёш кўриниш учун қандай кийиниш керак?

Нафақат юзидаги ажинлари, балки нотўғри танланган либоси ва кийиниш услуби ҳам аёл кишининг ёши катта кўринишига сабабчи бўлади.

Тўғри принт танланг

Турли майда эгри чизиқлардан иборат кийимлар образнинг консерватив ва ёш болаларникидек кўринишига сабаб бўлади. Геометрик нақш ва чизиқлар эса сизни жиддий, қоматнинг ихчамроқ кўринишига ҳисса қўшади.

Эластик белбоғли шим кийинг

Метаболизмнинг ёмонлашгани ва бошқа бир қанча сабаблар туфайли ёш ўтиши сайин вазн тобора ортиб боради. Жинси ва бошқа тор шимлар эса қорин ҳамда оёқларни қисиб, ноқулайлик келтириб чиқариши мумкин. Айнан шу сабаб ҳам стилистлар тепа қисми эластик моделларга эътибор қаратишни тавсия қилади.

Калта турадиган шимларни танлашдан чўчиманг. Бундай моделлар оёқларни узун, образни эса ўзига хос кўрсатади.

Рангларни тўғри танланг

40 ёки 50 ёшдан кейин ёрқин кийиниб бўлмайди, деб ким айтди? Ёрқин ва оч ранглар кишини қувноқ, фаол, энергияга тўла ҳамда ёшроқ кўринишга сабаб бўлади. Кийим борасида бундай танлов қилишдан чўчисангиз, ёрқин аксессуарларга эътибор қаратинг.

Қора рангдан воз кечинг

Қора ранг нафақат башанглик рамзи, балки ёши катта аёлларнинг униформасига ҳам айланиб бўлган. Унинг ўрнига кул ранг ёки жигарранг либос кийиш тавсия қилинади.

Ҳаддан ортиқ одми кийинманг

Эътибор жалб қиладиган ёшга мос бўлмаган ёки ҳаддан ортиқ сипо кийиниш ярамайди. Яхшиси, этак қисми бироз ассиметрик ёки кенгроқ моделларга эътибор қаратинг.

Тепа қисми ноодатий моделлардан танланг

Елка ва бўйин қисми бироз очиқ либос ҳамда блузкаларга эътибор қаратинг. Аммо ҳаддан ортиқ тор ва ёпишиб турмаслиги керак.

Аксессуарлар тақишни ҳаддан ортиқ ошириб юборманг

Ёшроқ кўринишни истасангиз, минимал услубда кийинишга ҳаракат қилинг. Бўйинга маржон, қўлга билакузук ва зиракларни бир образда мужассам қила кўрманг.