Зеленскийнинг ўрнини эгаллаши мумкин бўлган тўрт эҳтимолий номзод маълум қилинди

АҚШ президенти Доналд Трамп Украина янги президент сайлаши кераклигини айтганди. Унинг бу баёноти Украинанинг амалдаги раҳбари Зеленскийнинг сиёсий келажаги ва Украинада навбатдаги сайловлар қачон ўтказилиши ҳақидаги мунозараларни яна кучайтирди. Newsweek нашри Зеленскийнинг ўрнини эгаллаши мумкин бўлган тўрт нафар сиёсатчини санаб ўтди.

Нашр санаб ўтган биринчи номзод – Валерий Залужний. Украина Қуролли кучларининг собиқ бош қўмондони, ҳозирда мамлакатнинг Буюк Британиядаги элчиси бўлиб ишлаётган Валерий Залужний Зеленскийнинг асосий сиёсий рақиби сифатида кўрилади.

Украинанинг “Рейтинг” социологик гуруҳи эълон қилган сўровнома натижаларига кўра, эҳтимолий президентлик сайловида энг кўп овоз тўплаши мумкин бўлган номзодлар Зеленский ва Залужнийдир. Сўровнома иштирокчиларининг қарийб 23 фоизи амалдаги президентга, 20 фоиздан кўпроғи, эса собиқ бош қўмондонга овоз беришини билдирган.

Бироқ Залужнийга ишонч билдирганлар 64 фоизни ташкил этган. Зеленскийга ишонишини айтганлар эса 53 фоиз бўлган. Залужний келажакда президентликка номзодини қўйиши мумкинлиги ҳақидаги кўплаб тахминларга қарамай, бу борада очиқ баёнот беришдан тийилиб келмоқда.

Иккинчи эҳтимолий номзод Кирилл Буданов. У Украина Мудофаа вазирлиги Бош разведка бошқармаси раҳбари сифатида танилган. Генерал 2026 йил бошидан буён Зеленский маъмурияти раҳбари лавозимида ишламоқда. У президентлик сайловида қатнашишини айтмаган ва сиёсий келажаги ҳақидаги тўғридан тўғри саволларга жавоб беришдан қочиб келмоқда.

Учинчи тахминий номзод Михайло Федоров. Атиги 35 ёшда бўлган Федоров бир неча йил давомида Украинанинг дронлар йўналишидаги сиёсатига масъул шахслардан бири ва бош вазир ўринбосари сифатида ишлаган. 2026 йил январ ойида эса мудофаа вазири этиб тайинланган.

Орадан олти ой ўтиб, Зеленский, Федоров ва ўша пайтдаги Украина қуролли кучлари бош қўмондони, генерал Олександр Сирский ўртасидаги кескин келишмовчиликлар фонида у лавозимидан озод этилган.

Зеленскийнинг ўрнини эгаллаши мумкин бўлган навбатдаги шахс – Петро Порошенко. Петро Порошенко 2014–2019 йилларда Украина президенти бўлган. У бу лавозимни Россия Қримни аннексия қилган ва Москва Украинанинг шарқидаги Донецк ҳамда Луганск ҳудудларида сепаратистларни қўллаб-қувватлай бошлаган даврда эгаллаган. Порошенко 2026 йилда ҳам Украина парламентидаги мухолифатчи депутат сифатида фаолият юритмоқда. У 2019 йилги президентлик сайловининг иккинчи босқичида Зеленскийга ютқазган.