Зеленский: "Украина ва АҚШ бугун бешта асосий нарсани муҳокама қилади"

Украина президенти Владимир Зеленский АҚШ президенти Дональд Трамп билан бугун бўладиган учрашувда муҳокама қилинадиган масалаларни маълум қилди.

Бу ҳақда Зеленский журналистлар билан учрашувда айтиб ўтди.

Унинг таъкидлашича, Украина ҳозирда икки томонлама йўлга эга ва музокараларда беш асосий масала муҳокама қилинади: Украина-АҚШ хавфсизлик кафолатлари, Украина-Европа хавфсизлик кафолатлари, ҳарбий сектор, фаровонлик ва тикланиш режаси (унга кўра, тикланиш режаси учун бир нечта ҳужжатлар режалаштирилган) ва изчил ҳаракатлар режаси.

"Яъни, биз юқорида айтиб ўтган барча режалар ҳақиқатда ишлашини қандай таъминлашимиз мумкинлигини босқичма-босқич таклиф қилмоқчимиз. Улар (АҚШ - таҳр.) буларнинг барчасини Россия томони билан албатта муҳокама қиладилар ва биз фикр-мулоҳазаларни оламиз", деб тушунтирди Зеленский.

Эслатиб ўтамиз, Трамп Зеленскийни 28 декабрь куни Флорида штатидаги Мар-а-Лагодаги қароргоҳида қабул қилади.

Украина раҳбари ўзидан ташқари Украина делегацияси таркибига Миллий хавфсизлик ва мудофаа кенгаши котиби Рустем Умеров, иқтисодиёт вазири Олексий Соболев, Украина Қуролли кучлари Бош штаби бошлиғи Андрей Хнатов, Президент маъмурияти раҳбари маслаҳатчиси, Ташқи ишлар вазири Александр Бевуз ва Сергей Кислица ҳам киришини маълум қилган эди.

ОАВ маълумотларига кўра, Зеленский Трамп билан учрашувда тинчлик режасидаги асосий келишмовчиликларни бартараф этиш ниятида. Украина президентининг ўзи музокаралар чоғида ҳудудий масалаларни албатта кўтаришини очиқ айтди. Хусусан, томонлар Донбассни ҳам, Запорожье атом электр станциясини ҳам муҳокама қилади.