Зеленский: Июль ойида 30 мингдан ортиқ россиялик ҳарбий нишонга олинди

Украина президенти Владимир Зеленский июль ойида Мудофаа кучлари бўлинмалари учувчисиз тизимлар ёрдамида 30 мингдан ортиқ россиялик ҳарбийни нишонга олганини маълум қилди. Бу ҳақда у кечки видео мурожаатида билдирди.

Давлат раҳбарининг сўзларига кўра, энг юқори натижани Украина Хавфсизлик хизматининг «Альфа» махсус бўлинмаси қайд этган. Зеленский ушбу маълумотлар Украина Мудофаа вазирлиги томонидан тақдим этилганини таъкидлади.

Президент, шунингдек, Украина Хавфсизлик хизмати ва Мудофаа вазирлиги раҳбариятининг ҳисоботларини эшитганини, улар якунлари бўйича янги операцияларни маъқуллагани ҳамда август ойи учун хавфсизлик хизматининг устувор вазифаларини белгилаганини айтди.

Айни пайтда НАТО таркибидаги Украина учун хавфсизликка кўмак ва тайёргарлик ташаббуси (NSATU) раҳбарияти алмашди. Ушбу тузилма Украинага ҳарбий ёрдам етказиб бериш ва украиналик ҳарбийларни тайёрлаш ишларини мувофиқлаштиради.

Германиянинг Висбаден шаҳрида бўлиб ўтган маросимда генерал-лейтенант Гийом Н. Бопер NSATU қўмондонлигини генерал-лейтенант Кертис А. Баззарддан қабул қилиб олди.

НАТОнинг Европадаги бирлашган қуролли кучлари олий қўмондони генерал Алексус Г. Гринкевичнинг таъкидлашича, ушбу ўзгаришлар Украинага кўрсатилаётган ёрдамга таъсир қилмайди, аксинча, иттифоқчилар ўртасидаги мувофиқлаштириш самарадорлигини оширади.

Унинг айтишича, келаси йил давомида миссия қўмондонлигини европалик ёки канадалик офицерга топшириш режалаштирилган. Шунингдек, АҚШ раҳбарлик қилаётган Украина хавфсизлигига кўмак гуруҳи (SAG-U)нинг айрим вазифалари босқичма-босқич NSATU ихтиёрига ўтказилади.

Гринкевич бу ўзгаришлар иттифоқчиларнинг «НАТО 3.0» концепцияси доирасида масъулиятни янада кўпроқ ўз зиммасига олишга интилаётганини акс эттиришини таъкидлади.